مدرسة السلام

مدرسة السلام

‏الاثنين، 3 يناير 2011 في 05:22

التلامذة الشقيانين
مع طلعة الصبح الحزين
والحلم اللى مات مخنوق
والعمر اللى راح مسروق
طلعوا العيال الحزانى
طلعوا العيال جعانين
الشنطة بتهد حيلهم
والسواد واقف قبالهم
والمدارس م المعونة
والمناهج امريكانى
والمدرس حالته طين
وابتدى بدرى الطابور
اول طوابير الحياة
................
................

بيحيوا العلم المرخى فوق السارى
احمر وابيض واسود
الاحمر لون وش المستعمر والخمرة وقمصان النوم
والابيض لون الكفن البفتة والقطنة والحقنة الشرجية
والاسود لون القلب العاشق لعدوه ولون الايام الجاية

وموسيقى نشيد بلادى

============================

حصة مطالعة
------------

عادل يأكل الفول
عادل عيان على طول
عادل يعمل ليل نهار
عادل عيشته مرار ف مرار
عادل يمشى جنب الحيطة
عادل نفسه يعمل زيطة
عادل خايف يسجنوه
عادل طالع دين ابوه

============

اختبار حساب
-------------
اذا كان قطر الانبوبة اللى توصل غازنا لتل ابيب مترين
والمتر الواحد تمنه 70 سنت لكن تكلفته الفعلية دولارين
تقدر تحسب لحد نهاية الاتفاقية هانسدد الفرق كام و منين
ملحوظة ( عجلة الجاذبيبة الارضية 9.8 م/ث2 و الكرامة = صفر)

============

حصة جغرافيا
-------------

طلع خريطة مصر
دى ارض اتباعت للمستثمر بتراب الفلوس
ودى ارض منزوعة السلاح ياولاد الجاموس
ودى ماشى فيها خط غاز
وده شط معمول للشواذ
وعشان محدش ابن جزمة ..م اللى مش فاهم سياسة....ييجى ويبعزق كلام
يهرش دماغنا بكلمتين يضحك علينا بجملتين
ضرورى نفهم ان قدامنا التزام
يقول نعمر ..ويقول نشمر
والزرع ..والتين ..والزتون ..والسواعد ..والعرق
ويعيشونا ف القلق
طب وانت مالك
الارض راحت كلها ف الشبرقة والبعزقة
واللى تبقى منها .موضوع له خطة محندقة
تسألنى ليه ؟؟
من اجل تعميق السلام

عند خط العرض ده ..وعند خط الطول دهه
فى الحتة دى .. بتلاقى دولة اسرائيل
بعد اذنك .. لو بتسمح ..ممكن اسأل بس....
امال فلسطين تبقى فين؟
(اقولك ولا تزعلش)
بقى انت سيبت الخلق دول ..وجاى تسألنى السؤال ده
اطلع بره الفصل ... واياك اشوف وشك بكره
من غير ما اعرف مين العَرس اللى بيملا ودانك بكلام فارغ
بس يا استاذ
مابسش يابن الكلب
انت ايش فهم امك ف الجغرافيا
ميت مرة قلنا يا اولاد ... اللى ماهوش فاهم حاجة
احسن له يفضل مش فاهم ......فاهمين ياولاد ؟
ايوه يا استاذ فاهمين

============

حصة تاريخ
----- -----

زمان قبل النيل مايغير مجراه ويصب فى دلتا الوادى فى الناحية دى
كانت مصر اسمها بالفرعونى .. مصروه
على وزن كلمة احووه
لكن حصلت وقعة غريبة شوية ..فى الايام دى..
ليها مدلولها الخاص عند علماء الانثربولجى ..والمهتمين بتاريخ الدنيا
تثبت ببساطة ان تاريخنا ممكن يبقى سلاسل او حلقات
زى مسلسل ايامنا السودا وزى الغنوة المليانة اهات
كلها حلقات بتكمل بعض ..ممكن تتغير ف الشكل لكن مضمونها تقريبا واحد
وان اللى بيخرج بعصاية موسى ممكن يرجع تانى بعصاية امريكا

كانى ومانى ودكان الزلبانى
عارفين ياولاد الزلبانى دا يطلع مين؟
لأه يا استاذ مش عارفين
الزلبانى كان عنده دكان
بيبيع فيه حمص وبليلة وزلابيا وبراغيت الست
مرة كان بيقلِّب قمح بليلته... جات له نوبة سرحان
وتخيل نفسه بيحكم مصر
قال يفرق ايه بياع الحمص عن حكامنا وعن امراءنا
ماهى كده بتضيع .....وكده بتضيع
لكن لجنة او هيئة تفتيش النفس البشرية المختصة
عرفت انه صاحبنا بيفكر وبيحلم او بالمعنى الموجز موش عاجبه الوضع
قاموا طبعا بعد مانفخوا الراجل عملوا الدساتير
والدستور يعنى كتاب .. يضمن ويأمن ويأكد ان الحاكم يفضل حاكم
حكم مؤبد ..لحد جلالته او بسلامته ما ينفَق او يخلص من غير تغيير
ودى كانت اول فكرة دستور واتمنى تكونوا فاهمين
============

حصة علوم
----------

الدم بلازما وكرات حمرا وبيضا وصفائح دموية
والفرق الواضح بينه وبين الميه
ان الميه لما بتبرد ممكن تشربها
لكن لما الدم بيبرد
قول ع الدنيا يارحمن يارحيم
علشان كده دايما نسمع ستى وستك بتقول
الدم مايبقاش مية
لكن طبعا كلكوا عارفين يا ولاد
ان الدم ممكن جدا جدا وبخاصة فى الدول العربية
يبقى اسقع بكتير وارخص بكتير بكتير
لكن مش ده المقصود بالظبط
اللى عليكوا ف سنة تانية ان الدم زى ماقلت لكم ف الاول
ولما ها تكبر منك له
ممكن دمك يتسرق...
او يتحرق
ساعتها هاتحس بقرف
وماتزعلوش ياولاد
جتها نيلة اللى عايزة خَلف
======================

محرم صلاح الدين

مصر