شروع في لحن

شروع في لحن
كتب:بهاء جاهين

30-3-مارس 2012

بهاء جاهين


والله يا سعادة البيه انه كان شروع في لحن انتو اللي مقسمين الأوتار خمسات خمسات

والأرتام أربعات أربعات
والفرق كتايب كتايب
وف إيدكو مفتاح صول
ومفتاح حضرة الصول
حضرة الصول مفتاح
وحضرة الشاويش فرج
وأبلة إفراج مدرسة الموسيقي
المخنوقة بفردة شراب.. ميري.
والله يا جناب الصول انه كان شروع في شمس
كان شروق, كامل مكتمل
بس انتو حبستوه في بيادة
إنه كان عندليب
بس انتو غرقتوه في ميضة
كان شروع في عندليب
كان شيوع في نور عجيب
بيترسم ع الكون
بس انتو خدتوه خليتوه دكان
نور الإيمان
(بقال مسمي نفسه بالنيون)
شروع في تكشيرة خشوع
ما بين حواجب الشيخ صميدة
والله العظيم يا سعادة البيه ان انا فعلا كنت صدقت
ان بنت أحلامي المخنوقة في المستشفي
من خمستلاف سنة دبت فيها فجأة الروح
وفواتير عناية مركزة فاشلة آلاف سنين اندفعت
وإني واخدها ف حضني
بعد ما كنت يئست
والله يا جناب القفا العريض
إنه كان شروع في حلم
يا جناب القفا الملظلظ
والكف الماشاء الله شبرين ف شبر ونص
يا جناب الصوت الأجش
يا جناب الغضب- الله- ع الوش
يا جناب الجزمة بتهرس الرجل والروح
وما تعتذرش
يا أمة الإظلام
يا صوابع الرجلين يا قورة مكرمشة
يا ابتسام الكرش!
والله كنت ابتديت اصدق
كنت ابتديت ابتسم
كنت أبتديت أقول:
الحاجات اللي بغبائي فاكرها تخريف
طلعت بحق وحقيق
كلمة مصر..
اللي كنت لما اسمعها انكسف من نفسي
ولو بكيت
انكسف من نفسي أكتر
بقيت ابكي لما اسمعها
من غير ما انكسف
بقيت انكسف لو ما بكيتش
وكلام كتير تاني
افتكرت اني افتكرته مات
دلوقتي ماشي كل لحظة ف جنازته
لإني شفته بينقتل قدامي
يا جناب القتلة.. يا سعادة المجرمين
والله العظيم يا سيادة المجرمين
إني كنت نسيت الكاميرا
الكف اللي بيلسع القفا
ويشاور ع القناص ويقول:
الرصاصة الخفية.
انا ر ايح اسلم نفسي
للخواء واليأس
بس قبل ما اسلم نفسي للخواء و اليأس
أحب أشهد لكم بالعبقرية
بقيتوا تسكعوا الكف وتقولوا آه يا عيني
تسكعوا الكف وتقولوا آه يا عيني
لحد ما البلد.. كلها
بقت عميان
....
الله ينور
بس خدوا بالكو
فيه ناس هنا بتشوف
بنور القلب